مرحبا
كيف حالكم يا شباب ويا شبابات المنتدى ..
اليوم جايب لكم موضوع .. إنما إيه .. فله ..
الموضوع عبارة عن مصطلحات وكلمات منتشرة بيننا نحنا الشباب في المنطقة الغربية ..
بصراحة كلمات حلوة ولها معاني غريبة عجيبة
يلا نبدأ :
- أبو كلب أو أبو رفزة -
وهادي الكلمة تنقال لما يكون في شي ما يعجبك ، يعني زي لما يكون جوالك قديم ومعدوم العافية تقول عليه جوال أبو كلب ، ولمن يكون قلمك ما بيكتب زي الأوادم ويقطع تقول قلم أبو كلب
- الـ ـ ـ ـ -
انتشرت بشكل رهيب .. إضافة أل التعريف من باب المبالغة في الفترة الأخيرة .. زي مثلاً لمن تشوف واحد غشيم تقول مو بس غشيم .. الغشيم ههههههه ..<< ماراح يفهمها إلا أهل الحجاز وبصراحة لأنها تتنطق بطريقة مميزة ..
- انبراش -
نعرف إنو لمن تلعب كورة واحد يدخل عليك معناتها انبرش عليك .. لكن عند الشباب سار لها معنى تاني ، انبراشة سار معناها إنو دخلة غلط وسط الكلام ، يعني تكون إنت والشلة بتهرجوا في موضوع ويجي واحد يقول كلام مالو أي علاقة بالموضوع هنا نقول فلان انبرش .. وهادي تسير انبراشة .. ولا لمن يكون الكل ساكت ويجي واحد يقول كلام مالو اي داعي زي نكتة بايخة مثلاً هنا نقول على الحركة دي انبراشة
- حمزة -
حمزة هادا اللفظ معروف حالياً بين مجتمع الشباب بالشخص الكداب فلمن تلاقي أحد يبكش يقولولو بس يا حمزة
- جنط -
الكل يعرف جنوط السيارات طبعاً ، لكن اليومين دول سار برضو للجنط معنى تاني .. يعني لمن واحد يطفشك ويقرفك من كلامو يقولولك الشباب أعطيلو جنط يعني طناش
- دافور -
دافور معناها زمان في الحجاز الفرن ، ولكن دحين سار معناها البنت أو الولد الشاطر/ة في الدراسة نقول عنه دافور
اللي دايماً شغال ع الكتب ولا يسيبها
- دعس -
دي الكلمة تنقال للإقدام على الشي ، وتنفع مرادف لكلمة قدام .. يعني لمن مثلاً يجي أحد يقولك تجي نروح التحلية ؟ ترد عليه وتقول والله دعس يعني ياللا معاك .. ولا هيا شباب نلعب كورة .. يقولوا دعس
- شاكوش -
معناها الأصلي طبعاً المطرقة ، لكن دحين سار معناها البنت ولا الولد اللي مو حلو هههههههههه .. نقول عنو شاكوش
- شوربة -
طبعاً كلنا نعرف الشوربة أحلى شي عندنا هنا شوربة الحب على الفطور يا سلام سلم
لكن هنا معناها غير .. فلمن إنتا تقول شوربة يعني شي سهل ، فلمن مثلاً يكون عندك اختبار ويكون سهل مرة تقول الاختبار كان شوربة وكدا ...
ولا مثلاً تكلم أحد وتقولو أنا أروح شوربة ..
ولا تجي المدام تجيبلك الأكل تقوم تقولها حياتي من غيرك شوربة << كأنو إعلان
- طقطقة -
ودي الكلمة تنقال لمن تبغى تتسلى في واحد ، يعني تستعبط عليه وهوا أهبل يكون مسكين على نياتو فالشباب لو كانوا متجمعين مثلاً يقولوا جا فلان نطقطق عليه ولا تلاقي واحد يجي يقول أمس طقطقنا على راس فلان وزي كدا
- نمرة واستمارة -
ودي تنقال عند التأكيد وغالباً في الغباء والهبالة زي مثلا تقول فلان أهبل بنمرة واستمارة
- هبقة -
هبقة زمان أعتقد كان معناها سرقة لكن دحين اتغير المعنى فلمن تقول مثلاً والله هبقت أنا والشباب ورحنا الكباين مثلاً فهبقة هنا معناها طلعة وليها معنى تاني بمعنى هروب زي لمن طالب يقول أمس هبقت من المدرسة يعني شردت منها
- أرنب .. ركبتي ..-
من الكلمات اللي تدل إني أنا بأسمع بكش قدامي ، فيعني قلك بيسوا إنهم محترمين ومايبغو يقولوا للي قدامهم إنو كداب يقوموا يقولولوا كدا يعني زي واحد قاعد يتكلم ويحكي وكل كلامو بكش يقوم واحد يقول للتاني يووواد شوف شوف أرنب .. أو يا واد ركبتي توجعني
- يلعن أم الفله -
لمن يكون في شباب وعجبتهم مره الطلعة يقوموا يقولوا على الطلعة مثلاً يلعن أم الفله
- أمّووو -
يعني مثلاً مين فين لأمو حلو .. يابن الناس سيب أمو في حالها هيا إشلها صلاح
- فُكّنا -
يعني تكون مافيك و واصلة معاك على النهاية .. وأحد مطفشك تقولوا ياشيخ فُكّنا
- فُكّها -
ههههههههههه هادي المرة هوا حيفكها ، لمن الواحد تكون أخلاقو زفت ومرة طين تقولو ياشيخ خلاص فُكّها
- خرّييييش -
دي الكلمة لمن تكون جالس بين الشباب ويجيك واحد يجلس يكدب ويلفق في الحكاية ويملح فيها تقوم تقول خرّييييييش
- جييييّييييد -
بشد الياء .. لمن يعجبك الشي تقول عليه جيييّيييد
- كل فطير وطير -
يعني ياللا روح سرّي راحت عليك خلاص
- لا تدف -
كلمة حلوة وتنقال لمن تكون بتتكلم ومتحمس في الهرجة ومتفاعل في كلامك وبتأشر بيدك كدا وتطلع فيها وتنزل .. فأقولك لا تدف .. ولا لو واحد معصب وبيهزئ في الكلام ولا كدا يقول يللا بسرعة سوي كدا دحين .. تقوم تقولو طيب لا تدف
- زرقنة -
هههههههههههههههههههه كلمة جييّييدة .. واحد مخو ناشف يعني لو تقعد تقولو وتشرحلو وتترجى وهوا مُصِر كدا يعني كدا .. فهادا يكون مزرقن بقوة
- قردنة -
هادي غالباً ما تنقال على الناس اللي مزرقنين ، مثلاً تبغى تخرج وأبوك مُصِر إنك اليوم معاقب مافي خروج ، على طول يقولك صاحبك ياشيخ روح قردنو ، يعني روح جيب راسو .. مو تجيب راسو يعني تروح تقتل الرجال وتجيب راسو ههههههههههههههه
لا لا يعني تجيب الموافقة ويقول طيب
- أخرشها -
يعني أصرفها .. عندك كدا كدبة ومنتا عارف تكدبها وخايف وعامل الولد اللي عمرو ما يكدب وإنت دحين في ورطة ولازم تكدب يقوم صاحبك يقولك ياشيخ خلاص أخرشها ولا أصرفها
ولا سويت مصيبة وتبغى نلف الموضوع فتبدأ تفكر كيف تخرشها ولا تصرفها
- نص كُم -
حركات النص كُم دي بطلوها .. تقعد تعملي إنك ولد محترم في النهاية إيش تبغى !! قول كدا من الأخير .. عندك شي تبغاه مصلحة تبغاها قول لكن لا تقعد تدّحلس عندي وتعمل حركات النص كُم
إن شاء يعجبكم الموضوع
الرئيسية 
التسجيل 
دخول .gif)
منتدى الفرفشة
موضوع: كلام شباب الغربية .. 
الإثنين ديسمبر 10, 2007 8:50 pm
